Կին նորարարների եվրոպական մրցանակ. Հայաստանից հիմնադիրները կարող են հավակնել մինչև 100 000 եվրոյի
Եվրոպական նորարարության և տեխնոլոգիաների ինստիտուտը (EIT) և Եվրոպական նորարարությունների խորհուրդը (EIC) հայտերի ընդունում են սկսել Կին նորարարների եվրոպական մրցանակ 2027-ի համար։ Առավելագույն պարգևը 100 000 եվրո է։ Քանի որ Հայաստանը «Հորիզոն Եվրոպա» ծրագրի ասոցացված երկիր է, մրցանակին կարող են դիմել նաև Հայաստանից կին հիմնադիրներն ու համահիմնադիրները։ Հայտերն ընդունվում են մինչև դեկտեմբերի 1-ը՝ Բրյուսելի ժամանակով 17:00 (Երևանի ժամանակով 20:00)։
Մրցանակը շնորհվում է երեք անվանակարգով.
- Women Innovators՝ ԵՄ և «Հորիզոն Եվրոպա»-ին ասոցացված երկրների կին հիմնադիրների և համահիմնադիրների համար։ Պարգևները՝ 100 000, 70 000 և 50 000 եվրո։
- Rising Innovators՝ մինչև 35 տարեկան կին նորարարների համար։ Պարգևները՝ 50 000, 30 000 և 20 000 եվրո։
- EIT Women Leadership՝ EIT համայնքի անդամների համար։ Պարգևները՝ 50 000, 30 000 և 20 000 եվրո։
Հայտերը ներկայացվում են ԵՄ Funding & Tenders պորտալում՝ ըստ մրցույթի կանոնների։ Հայտին կցվում է մինչև 90 վայրկյան տևողությամբ տեսաուղերձ, որում դիմորդը ներկայացնում է իրեն և իր ձեռքբերումները։ Rising Innovators անվանակարգում պահանջվում է նաև տարիքը հավաստող փաստաթուղթ։ Մրցանակաբաշխությունը տեղի կունենա 2027-ի երկրորդ եռամսյակում։
Հայաստանը «Հորիզոն Եվրոպա» ծրագրի լիիրավ ասոցացված անդամ է 2022-ի փետրվարի 11-ից, ինչը հայաստանյան հետազոտողներին և նորարարներին թույլ է տալիս մասնակցել ծրագրին ԵՄ անդամ երկրների կազմակերպությունների հետ նույն պայմաններով։
Հարցերի համար՝ Women Innovators և Rising Innovators անվանակարգեր՝ EISMEA-WIP@ec.europa.eu, EIT Women Leadership անվանակարգ՝ eit-awards@eit.europa.eu։
