Սահմանամերձ հանքավայրերում նոյեմբերի 12-ից արդյունահանումը թույլատրվելու է միայն GPS-ով տեխնիկայով

Սահմանամերձ գոտու և սահմանային գետերի ափերի հանքավայրերում արդյունահանման տեխնիկայի և բեռնատարների վրա GPS-ի պարտադիր պահանջը Հայաստանում ուժի մեջ է մտնում 2026-ի նոյեմբերի 12-ից։ Եթե թրեքերը չի աշխատում կամ սերվերի հետ կապ չկա, արդյունահանումն ու փոխադրումը պետք է դադարեցվեն։

Կառավարությունը N 1211-Ն որոշումն ընդունել է 2026-ի օգոստոսի 13-ին։ Այն ուժի մեջ է մտնում պաշտոնական հրապարակմանը հաջորդող 90-րդ օրը։ Կառավարության բացատրությամբ՝ նպատակն արդյունահանումն ու փոխադրումն ավելի թափանցիկ դարձնելն ու ապօրինի արդյունահանման ռիսկը նվազեցնելն է։

Ինչ է պահանջվում

Ընդերքօգտագործողը կարող է արդյունահանում իրականացնել միայն՝

• բեռնման և տեղափոխման տեխնիկայով,
• օգտակար հանածոները դուրս բերող բեռնատարներով,

եթե դրանց վրա տեղադրված է GPS, որը մշտապես միացված է սերվերին և տվյալները փոխանցում է իրական ժամանակում։

Տեխնիկան համարվում է չկահավորված, եթե GPS-ը բացակայում է, անսարք է կամ անջատված, ազդանշան չկա, սերվերի հետ կապն ընդհատվել է կամ տվյալներն իրական ժամանակում չեն փոխանցվում։ Այդ դեպքում տվյալ տեխնիկայի աշխատանքը պետք է անհապաղ դադարեցվի։ Այն կարելի է վերսկսել միայն խնդիրը վերացնելուց հետո։

Սերվերին և տվյալներին ներկայացվող պահանջները

Սերվերը պետք է շուրջօրյա ընդունի տվյալները և պահի դրանք մինչև մեկ տարի։ Պահանջի դեպքում տվյալները պետական մարմիններին պետք է տրամադրվեն երեք աշխատանքային օրվա ընթացքում։ Եթե ընդերքօգտագործողն ինքը չի սպասարկում համակարգը, պայմանագիր է կնքում ծառայություն մատուցողի հետ։ Սակայն խախտումների համար պատասխանատվությունը, անկախ պայմանագրից, կրում է ընդերքօգտագործողը։

Ով է ստանում տվյալները

GPS-ի տվյալներին հասանելիություն ունեն չորս մարմին՝

1. Բնապահպանության և ընդերքի տեսչական մարմինը, որը վերահսկում է նաև որոշման կատարումը,
2. Ազգային անվտանգության ծառայությունը,
3. Գլխավոր դատախազությունը,
4. Պետական եկամուտների կոմիտեն։

Պատասխանատվություն

GPS չունեցող տեխնիկայով արդյունահանման կամ փոխադրման դեպքում վրա է հասնում վարչական պատասխանատվություն՝ Վարչական իրավախախտումների վերաբերյալ օրենսգրքի 60.1-ին հոդվածի 9-րդ մասով։

Ում է վերաբերում

Սահմանամերձ գոտում և սահմանային գետերի ափերին օգտակար հանածոներ արդյունահանող ընկերություններին, նրանց կապալառուներին և հանքաքար փոխադրողներին, ինչպես նաև GPS մոնիթորինգի ծառայություններ մատուցողներին։

Ինչ անել մինչև նոյեմբերի 12-ը

1. Կազմել սահմանամերձ տեղամասերում աշխատող արդյունահանման ամբողջ տեխնիկայի և բեռնատարների ցանկը։
2. Տեղադրել թրեքերներ և ստուգել, որ տվյալները փոխանցվում են իրական ժամանակում։
3. Եթե համակարգը սպասարկում է կապալառուն, կնքել պայմանագիր՝ տվյալների պահպանում մեկ տարի, տրամադրում պահանջով՝ 3 աշխատանքային օրում։
4. Նշանակել աշխատակից, որը կհետևի կապին։ Եթե ազդանշանը կորել է, տեխնիկան պետք է կանգնեցվի։

Լուսանկարը՝ Magnific/senivpetro